Spennandi vika með óspennandi flensu!

Frá því um helgina hef ég verið að drepast úr kvefpest og hef ég ekki orðið svona veik síðan ég flutti til Danmerkur. Hausinn stútfullur af hori með tilheyrandi höfuðverk, ennisholur stútfullar og ekki sjéns að sofa nema með trantinn fullan af hálsmolum....yndislegt alveg hreint.  En þrátt fyrir þetta þá hef ég ákveðið að halda mínu striki þessa vikuna, enda fullt að gerast. Í kvöld kemur Gummi vinur minn og fyrrverandi starfsfélagi með flugi til Billund og ætlum við Kolla að keyra þangað í kvöld til að sækja hann. Í fyrramálið er svo mömmuklúbbur hjá mér og á ég von á því að mæting verði 100%. Enginn leikskóli er í boði núna þar sem  pædagogar eru í verkfalli (jú jú...þeir tóku við af samstarfmönnum sínum) og munu "verkfallsbörnin" því líka mæta í fyrramálið.....það stefnir því í þrusu mömmumorgun með tilheyrandi barnafjöri....bara gaman að því:)

Á fimmtudaginn verður svo horft á undankeppni Evróvision og þannig kynt undir aðalkvöldið sem verður á laugardaginn. Búið er að plana og bjóða í heljarinnar veislu hér á laugardaginn í tilefni af því að ég er alveg að skríða í fertugsaldurinn og mun gleðin halda áfram fram eftir kvöldi fyrir þá sem eru í því stuðinu....svo ég tali nú ekki um þá sem eru heitir Evróvisionáhugamenn....því að sjálfsögðu verður hækkað í sjónvarpstækinu og fylgst með keppninni með gleði- og sönggefandi drykk í hendi:)

Nú er bara að vona að flensudruslan hverfi svo hægt sé að njóta sín til fulls þessa vikuna.

Mamma farin og komin dagsetning á keisarann:)

Mamma fór eldsnemma í morgun eftir að hafa verið hjá okkur í 11 daga. Það var yndislegt að hafa hana hjá okkur og var erfitt að þurfa að segja bless í morgun. En sem betur fer mun hún koma ásamt pabba aftur eftir einn og hálfan mánuð:) Hermann naut þess að hafa ömmu sína og var ekki sáttur við að hún væri að fara aftur heim, en varð þó aðeins sáttari þegar honum var sagt að amma ætlaði að sækja afa Hreinsa og koma með honum eftir nokkra daga:)

Við mamma notuðum hvern dag vel, fórum í flestar stóru búðirnar í Horsens, lágum í sólbaði, fórum á ströndina, í Legoland, til Árósa í Bambagarðinn og miðbæinn, í Bygholm park og fleira skemmtilegt. Einnig þvoðum við og straujuðum öll barnafötin, rúmfötin, handklæðin og fleira fyrir litla barnið þannig að nánast allt er orðið klárt:)

Í gær fórum við í sónar og viðtal og fengum við góðar fréttir.....nýrnastækkunin í barninu er gengin tilbaka og allt í lagi með allt. Barnið orðið 1948 grömm og því viku stærra miðað við meðgöngulengd...semsagt stórt barn á leiðinni. Því miður fengum við ekki að ráða hvaða dag ég fer í keisarann þar sem aðeins er skorið á mánudögum og miðvikudögum. 2. júlí var því dagsetningin sem við fengum en ég vildi fá 3ja júlí því þá verður mamma sextug. En svona er þetta bara....það er bara gott að allt lítur vel út, nýrun komin í lag og barnið stórt og því tilbúið í keisara 10 dögum fyrir áætlaðan tíma:)

Ég er svo stolt af mömmu fyrir að koma ein til okkar, hún sem er flughrædd og hefur aldrei ferðast með lest. En hún reddaði sér alla leið þrátt fyrir smá erfiðleika og á stórt hrós skilið. Akkúrat núna er hún á flugvellinum á Kastrup og bíður eftir fluginu heim.

Elsku mamma....takk fyrir að koma til okkar og eyða þessum dögum með okkur. Það var frábært að hafa þig. Takk fyrir alla hjálpina, allar gjafirnar og skemmtunina. Hlökkum til að sjá ykkur pabba aftur í lok júní.

Pínu blogg!

Mamma komst heil á húfi til Horsens á mánudaginn þrátt fyrir að hafa nánast misst af fluginu og misst af lestinni!! En sú gamla reddaði sér öðrum lestarmiða á lestarstöðinni á Kastrup með því að nota táknmál og slatta af brosi þannig hún komst á leiðarenda aðeins klukkutíma á eftir áætlun:)
Mamma kom klifjuð gjöfum frá Íslandi og má þar nefna flugna/köngulóarfælur, ilmvatn, nammi, flatbrauð, kex, lambakjöt á grillið, lambahrygg og smurt flatbrauð með hangikjöti frá Svenna og Marzennu og margt fleira. Hermann fékk einnig smá nammi og DVD mynd frá ömmu sinni og afa og aðra DVD mynd frá Hrafnhildi og Gunnari. Takk æðislega fyrir okkur þið öll**

Við mamma höfum haft það gott síðustu daga......höfum skipt deginum niður í búðarráp og sólböð á pallinum og erum því orðnar brúnar og peningalitlar...eða allt að því;) Veðrið hefur verið algjör snilld...yfir 20 stiga hiti og heiðskýrt og fellur það vel í kramið hjá mömmu minni....en ég hef ekki höndlað þennan hita eins vel. Samt er ég fegin að vera ekki heima á Húsavík núna því þar er snjókoma!! 

Hermann nýtur þess í botn að hafa ömmu sína hjá sér og á eflaust eftir að vera miður sín þegar hún fer heim aftur eftir viku. Hann hefur fengið að vera heima að mestu þessa vikuna nema í dag og í fyrradag fór hann í tvo tíma í leikskólann á meðan við mamma kíktum í búðir, enda ekki alveg það skemmtilegasta að hans mati. En við höfum kíkt í Bygholm park og á ströndina svo eitthvað sé nefnt og ætlum við svo í Legoland um helgina....enda aldrei komið þangað:)

Við erum nýkomin heim úr matarboði en Kolla og Hlynur buðu okkur í mat og fengum við heljarinnar veislu eins og við var að búast af frú Kolbrúnu:) Takk fyrir okkur elsku Kolla og Hlynur**

Í dag eiga tvær frábærar konur afmæli......hún Ásta mágkona er 24 ára og Kidda vinkona er þrítug ....TIL HAMINGJU ELSKU ÁSTA OG KIDDA**

Pallurinn klár:)

Dagurinn í gær var tekinn með trukki og var smíðaður pallur yfir stéttina á mettíma, eða innan við 5 klukkustundum!! Raggi ætlaði reyndar ekkert að byrja á smíðinni í gær, en ákvað að byrja að skrapa stéttina og svona "undirbúa" um hádegisbilið en svo leiddi bara eitt af öðru....enda veðrið alveg tilvalið til útivinnu. Ég lagði mig um hádegið í klukkutíma og þegar ég skreið úr rekkju klukkan eitt voru undirstöðurnar tilbúnar og kallinn að byrja að negla fjalirnar. Svavar mætti svo um kaffileytið og lagði lokahönd á verkið með Ragga. Eftir smíðina komu svo Viðar og Rakel líka og fengum við okkur vöfflukaffi og mátuðum pallinn.....sem að sjálfsögðu smellpassaði við okkur:)

 

 

 

 

 

 

Í dag fór að hellirigna og ekki mikið sólbaðsveður en þó stytti upp þegar líða tók á daginn og gátu vinirnir, Emil og Hermann leikið sér aðeins saman úti. En alla helgina og næstu viku er spáð hátt í 20 stiga hita og sól þannig að planið er að flatmaga sig á pallinum og njóta lífsins. Á mánudaginn mætir svo móðir mín í öllu sínu veldi og teljum við Hermann niður dagana. Frábær byrjun á dönsku sumri:)

Arnór Ingi systursonur Ragga er 10 ára í dag.....Innilega til hamingju með daginn elsku Arnór**

Hermann útskrifaður af eyrnaveseninu....7,9,13:)

Fórum eftir hádegið í dag til háls-, nef-, og eyrnasérfræðingsins og fengum við heldur betur góðar fréttir......öll sýking farin og hljóðhimnan gróin. Því þarf ekki að setja í hann annað rör eða gera aðrar úrbætur. Heyrnin var líka athuguð og tækið sýndi að öll virkni á milli heila og eyra eru í góðu lagi. Mikið vorum við hjónin fegin....bara vonandi að þetta mistakavesen sé allt búið fyrir fullt og allt.

Annars er allt hið besta að frétta....kíktum í Matsbypark í Fredericia á laugardaginn með Hermann og fékk hann góða útrás þar:)
Í gær var heldur betur steik...22°C og sól. Við vorum því úti nánast allan daginn, fyrst fórum við í langan göngutúr og svo skellti Raggi sér í garðvinnu á meðan ég sleikti sólina.....fínt að vera óléttur, hóst*hóst* Hermann fékk nýjan vin í heimsókn og smullu þeir vel saman og léku sér að mestu inni vegna hitans. Þegar við komum loksins inn úr hitanum þá hafði ég náð mér í smá brúnan lit en Raggi tók rauða litinn með trompi og var því eins og karfi í gærkvöldi þegar hann fór að sofa:)

Ekkert virðist vera að leysast í verkfallsmálunum en sem betur fer hefur Hermann fengið að vera á leikskólanum allan verkfallstímann en svo verður hann heima í næstu viku....ég reyndar valdi þá viku í "verkfallsfrí" því mamma mín verður komin til okkar og því verður hann heima hvort eð er til að njóta þess að láta ömmu sína stjana við sig og við við hana auðvitað:) Verkfallið bitnar samt á okkur að því leytinu að ljósmæður eru líka í verkfalli og átti ég að fara til ljósmóður í síðustu viku (í annað sinn alla meðgönguna!!) en tíminn var felldur niður og á ég að hringja og fá nýjan tíma þegar verkfallið leysist......bara vonandi að verkfallið taki ekki 10 vikur eins og síðast í Árósum því þá verð ég búin að eiga!!

 

Okkar nánustu ættingjar eru að vinna í sínum sumarfrísmálum og erum við búin að fá nokkrar dagsetningar en þó ekki allar. Þeir sem hafa í huga að kíkja til okkar í sumar en eru ekki búnir að panta flug eða láta okkur vita mega fara að gera það því hótel Engblommevej er að verða fullbókað:)

Það er komið sumar:)

Vikan hefur heldur betur verið sumarleg og yndisleg.....heiðskírt alla daga og sól. Danir halda ekki upp á sumardaginn fyrsta og því hefur dagurinn hér verið eins og hver annar virkur dagur. En við Íslendingarnir fögnum þessum degi og vonum að rigningarspáin næstu daga rætist ekki svo maður geti haldið áfram að sleikja sólina innan um alla maurana og köngulærnar sem eru fyrir löngu komnar í sumarfrí:)

Gleðilegt sumar elsku vinir og ættingjar og takk fyrir veturinn.

Hamburg er málið!!

Um kvöldmatarleytið í gær komum við heim eftir alveg snilldar helgi í Hamburg. Við lögðum af stað í bítið á föstudaginn og vorum komin fljótlega eftir hádegið á hótelið okkar þar sem við skráðum okkur inn og hentum inn töskunum. Því næst brunuðum við í miðbæ Hamburgar þar sem við töltum um göngugöturnar og spókuðum okkur í ekkert allt of góðu veðri. Miðborgin er mjög snyrtileg, með stórum og flottum húsum og verslunarmiðstöðvarnar voru þónokkrar með hundruði verslana. Við lögðum bílnum okkar í bílastæðahús í stórri verslunarmiðstöð á göngugötunni og stærðin á "mollinu" var þvílík að við ætluðum aldrei að finna útgönguleiðina. Það sama átti við þegar við fórum að sækja bílinn aftur.....við þurftum tvær tilraunir inn í "mollið" og gott rölt þar inni til að finna bílastæðin!! Eftir fínt rölt, með viðkomu á Starbucks (ójá....það er Starbucks í Hamburg) fórum við upp á hótel og löbbuðum svo yfir götuna á KFC (jebb....KFC var hinum megin við hótelið) þar sem við fengum okkur borgara í kvöldmat.

Eftir frekar erfiða nótt með tilheyrandi næturbrölti af minni hálfu og litlum svefni þá vaknaði Hermann klukkan 7 og gaf pabba sínum afmælispakka og koss í tilefni dagsins. Því næst var farið í morgunmat þar sem við gátum borðað okkur pakksödd. Deginum var svo eytt í stærsta dýragarði Evrópu....Hagenbeck tiergarten. Við vorum komin þangað 10:30 og byrjuðum á því að skoða vatnaveröldina, en það er nokkurs konar neðansjávardýragarður með hinum ýmsu sjávardýrum og einnig var þar inni regnskógur með ýmis konar skriðdýrum, leðurblökum og fleirum ógeðfelldum dýrum. Í dýragarðinum sjálfum voru öll helstu dýr jarðar, fílar, mörgæsir, kengúrur, ísbjörn, beljur og allt þar á milli. Klukkan 17 vorum við loksins búin að ganga allan garðinn en samt stoppuðum við bara einu sinni til að fá okkur að borða. Ég held að ég hafi sjaldan verið jafn fegin að sjá bílinn minn ....gjörsamlega búin á því eftir 6 tíma labb!! Og Hermann...jahhh....þreyttur er ekki nógu sterkt orð til að lýsa honum. Hann sofnaði á nokkrum sekúndum eftir að hann kom í bílinn.

Eftir gott bað á hótelinu þá fórum við út að borða á veitingarstað sem var við hliðina á hótelinu. Sá staður hét Einstein og vorum við svo heppin að þjónninn okkar talaði fína ensku þannig að hún gat þýtt fyrir okkur matseðilinn. Það er nefnilega svo merkilegt með Þýskaland, að það er nánast hvergi hægt að fá enska matseðla og alveg hending ef maður hittir á fólk sem talar ensku. Við t.d. lentum í vandræðum í miðasölunni í dýragarðinn því konan skyldi ekki stakt orð í ensku og hvergi enskar leiðbeiningar í öllum dýragarðinum.

Á sunnudaginn þegar við vorum búin að borða morgunmat og skrá okkur út af hótelinu þá fórum við í Miniatura wonderland sem er nokkurs konar safn með heilu bæina, borgirnar, Alpana og annað landsslag í smækkaðri mynd. Þvílík upplifun og hélt Hermann varla vatni yfir þessu, enda smágerðar lestar á fullri ferð út um allt. Eftir rölt um safnið þá kíktum við aftur í miðbæinn, fórum út að borða á ekta ítölskum stað og nutum lífsins áður en við lögðum í hann aftur heim.

Semsagt......frábær helgi í alla staði og mælum við svo sannarlega með Hamburg.

Skemmtileg vika

Sjaldan hefur ein vika verið jafn fljót að líða. Reyndar er vikan ekki nema hálfnuð en engu að síður líður hún á skothraða. Mánudagurinn fór í letikast með tilheyrandi sápuóperuglápi fram eftir degi, en þegar kallarnir voru komnir heim úr leikskóla og skóla þá fórum við í rosa fínan göngutúr í góða veðrinu og svo var bíllinn ryksugaður og þrifinn. Í gær var ræs klukkan rúmlega 6 að frumkvæði Hermanns og þegar hann var farinn á leikskólann þá fór ég til Kollu í "kaffi". Um hádegið mætti svo Árósarpæjan hún Kidda á svæðið og fórum við þrjár í Bytorv á kaffihús og höfðum það huggulegt yfir Nachosi og Brunch. Eftir afmælisgjafakaup í Bytorv þá fórum við Kidda heim, settumst út á "pall" í sólina og höfðum það kósý á meðan karlpeningurinn á heimilinu sló lóðina og lék sér í fótbolta.....fín skipti þar á ferð:)

Eftir kvöldmatinn kom svo Kolla í heimsókn til okkar og sátum við vinkonurnar þrjár á snakki langt fram eftir kvöldi. Kidda ákvað því bara að gista í nótt og fór heim í morgun klukkan verða 10. Takk fyrir skemmtilegan dag elsku Kidda og Kolla:)

Þegar ég var búin að "skila" Kiddu á lestarstöðina og Hermanni á leikskólann í morgun þá fór ég í minn vikulega mömmu/bumbuklúbb og var það alveg frábært. Við fengum gott að borða hjá henni Betu og svo fórum við líka í smá göngutúr út á rólóvöll til að "viðra" krakkana sem voru heima vegna verkfalls pædagogsmedhjælpere. Þegar klukkan var orðin hálf 3 þá náði ég í Ragga og Hermann. Við skelltum okkur í göngutúr í búðina enda veðrið yndislegt og því ekki nokkur leið að hanga inni. Eftir kvöldmatinn kíktu svo Rakel og Viðar í heimsókn og gátu Viðar og Hermann leikið sér saman í smá stund, enda ekki sést í allan dag þar sem Viðar var heima vegna verkfallsins en Hermann verður heima þegar lengra líður á verkfallið.

Á morgun er ekki mikið planað nema að pakka niður í tösku og kíkja kannski til Kollu minnar, en miðstrákurinn, hann Hafsteinn er 11 ára á morgun. Á föstudaginn verður svo farið á fætur í bítið og brunað til Hamburgar og helginni eytt þar á hóteli. Jeminn hvað ég hlakka til:)

Það er því ekki hægt að segja annað en að sumarið sé komið og góða skapið með. Svo styttist í að mamma mín komi til okkar, en hún kemur 5. maí og verður þvílíkt gaman að sjá hana loksins eftir næstum 9 mánaða aðskilnað.

Ágúst Már frændi minn varð 11 ára í gær......Til hamingju með daginn elsku Ágúst minn**
Já og svo er kallinn 28 ára á laugardaginn.....jeminn eini.....hann sem var bara 17 ára þegar við kynntumst, hehe:)

Eyrnafréttir!!

Var í mömmuklúbb í gær þegar það var hringt frá leikskólanum og mér sagt að Hermann hafi meitt sig. Vegna tungumálaskilningsleysis hjá mér þá skyldi ég bara að hann hafi meitt sig, blóð, kannski slysó en voða lítið annað. Ég rauk því bara af stað, hringdi í Ragga á leiðinni og sagði honum að hann þyrfti örugglega að koma með mér á slysó. Þegar ég kom niður á leikskóla þá sat Hermann greyið í fanginu á leikskólakennara grátandi og hafði hann þá meitt sig á þumalfingri. Enginn sá hvað gerðist en talið var að hann hafi klemmt sig á útidyrahurðinni og sagði Hermann svo vera. Þar sem mikið hafði blætt úr fingrinum og greinilegur skurður komið þá vildu þær að ég færi með hann til læknis eða slysó og því ákváðum við að hringja í heimilislækninn hans sem kippti honum inn "med det samme". Sem betur fer var skurðurinn grunnur og puttinn ekki brotinn þannig að sárið var bara sótthreinsað og plástur settur á. En fyrst við vorum komin til læknisins þá sögðum við honum að þrátt fyrir að Hermann væri búinn með sterka pensilín skammtinn sinn þá myndi ennþá vella úr eyranum á honum. Þetta þótti lækninum ekki nógu gott og hringdi í heyrnarsérfræðinginn (sem við eigum tíma hjá þann 28.) og sagði honum að ekki væri hægt að bíða lengur og hvernig staðan væri. Því fengum við tíma strax í morgun fyrir Hermann sem við að sjálfsögðu þáðum með þökkum.

Í morgun fórum við því með Hermann til heyrnarsérfræðingsins (háls-nef og eyrnalæknisins) og eftir um klukkustundarbið á biðstofunni vorum við kölluð inn. Læknirinn var alveg yndisleg ung kona sem Hermanni leist voða vel á. Í ljós kom að sýkingin í eyranu á Hermanni er ennþá mikil og því ekki nokkur leið að sjá inn í hljóðhimnu. Þrátt fyrir að hún hafi ryksugað eins mikinn merg út úr eyranum á honum og hún gat þá var það ekki nóg til að sjá alveg inn. Hann fékk því dropa í eyrun sem hann á að fá tvisvar á dag næstu 8 daga og svo eigum við að koma aftur þann 28. apríl og þá verður ákveðið með framhaldið og heyrnarmælt. Hún gat heyrnarmælt hægra eyrað og það kom vel út:) Svo er bara að vona að þetta lyf virki núna og hljóðhimnan grói af sjálfu sér svo hann þurfi ekki að fá önnur rör.

Það sem mér finnst svo gott hér í Danmörku er hvað þeir læknar sem við höfum kynnst eru yndislegir og "mannlegir". Framkoman við Hermann er í alla staði frábær og hefur þetta orðið til þess að öll læknahræðsla (sem var svakalega eftir að læknirinn misþyrmdi honum í fyrra) hefur horfið og hann gerir allt sem hann er beðinn um án þess að hika. Læknarnir leyfa honum alltaf að vera með í öllu sem þeir gera, ýta á takka á tækjum, skoða skjáina, prófa sjálfur og svo er honum hrósað í hástert og gefið verðlaun. Margir læknar á Íslandi mættu taka sér þetta til fyrirmyndar, þó að þeir séu að sjálfsögðu jafn misjafnir og þeir eru margir.

En svona standa semsagt eyrnamálin að þessu sinni.

Góða helgi öll sömul og farið varlega í umferðinni.....hrikalegt að heyra um öll bílslysin á Íslandi síðustu daga:(

Meiri lyf og Hamburg.

Þrátt fyrir að litli prinsinn minn hafi fengið pensilínskammt í síðustu viku þá hafði það ekkert að segja við sýkingunni í eyranum á honum. Í dag fékk hann því annan, sterkari skammt af pensilíni. Ekki alveg það sem ég óskaði en greyið getur ekki verið svona þangað til hann fer til sérfræðingsins í lok mánaðarins. Hann finnur ekki til en þetta að sjálfsögðu pirrar hann mikið og fylgir þessu mikil lykt....hann klórar sér í eyranu endalaust og eru næturnar ekki undanskyldar. Þegar hann fær síðan "jukkið" á puttann þá reynir hann að klína því í koddann sinn, sængina eða vegginn, hálfsofnandi, eða það sem verra er....í andlitið á mér!!  Yndislegt að vakna við mergsmyrslun á fésið....eða þannig!! Ekki bætir úr skák að með endalausu klóri sínu þá gerir hann sár í eyrað sem verður viðkvæmt og því ekki alltaf auðvelt að þrífa eyrað, sem þarf að gera nokkrum sinnum á dag!! Ég ætla rétt að vona að þetta nýja lyf virki vel....ekki hægt að bjóða litla kalli upp á þetta lengur. En eitt skilur maður ekki......hvaðan kemur allt þetta "jukk"?? Er bara endalaus forði í svona litlum haus....maður spyr sig!!!

En nú styttist í að Raggi eigi afmæli....og erum við búin að bóka hótel í Hamburg afmælishelgina hans. Það er frí í skólanum á föstudeginum og þar sem við förum nú eitthvað lítið (eða ekkert) í sumar þá ákváðum við að skella okkur í helgarferð til Hamburgar og njóta okkar. Við erum búin að plana að fara í dýragarðinn Hagenbeck sem er stærsti dýragarður Evrópu (að mér skilst). Í þessum dýragarði er frægi ísbjörninn Knútur og þar er einnig vatnaveröld þar sem hægt er að skoða sjávardýr neðansjávar. Hermann á pottþétt eftir að finnast þetta æðislegt og hlökkum við mikið til:)

Annars er bara allt rólegt, við hjónin sitjum og horfum á fótboltaleik (já eða Raggi horfir og ég kíki annað slagið), en það er Liverpool og Arsenal sem eru að keppa og er Raggi hreinlega að missa sig. Stekkur annað slagið uppúr sófanum með tilheyrandi látum en sem betur fer eru Poolararnir einu marki yfir núna og Raggi kominn með bjór í hendi til að fagna....eins gott að staðan breytist ekki Arenal í vil!!

Svo er sumarið handa hornsins....sólin skín nánast daglega en samt kólnar mikið á næturna og þurfti ég t.d. að skafa bílinn í gærmorgun þar sem ég setti hann ekki í bílskýlið yfir nóttina. Það er orðið bjart snemma á morgnana og dimmir seinna á kvöldin þannig að geðheilsan er líka á uppleið með vaxandi sól:)